Þingeyjarskóli tók til starfa haustið 2012 eftir sameiningu grunnskólanna Hafralækjarskóla og Litlulaugaskóla og tónlistardeilda þeirra og
leikskólanna Barnaborgar og Krílabæjar. Grunnskólinn og tónlistardeildirnar
störfuðu bæði í Litlulaugaskóla og í Hafralækjarskóla til vors 2015 en þá var ákveðið að færa alla starfsemi skólans, nema leikskóladeildanna, í húsnæði Hafralækjarskóla og um leið að nota alfarið nafn Þingeyjarskóla. Í ágúst árið 2019 var starfsemi leikskóladeildarinnar Barnaborgar færð í húsnæði Þingeyjarskóla á Hafralæk. Haustið 2024 var gerð sú skipulagsbreyting að ráðinn var skólastjóri leikskóladeilda og þar með starfa tveir skólastjórar við Þingeyjarskóla.
Mötuneyti í Þingeyjarskóla annast innkaup og matseld fyrir nemendur grunnskóladeildar og Barnaborgar og matsalur er sameiginlegur. Í Krílabæ á Laugum er matreitt daglega fyrir nemendur og starfsfólk deildarinnar. Þónokkrir kennarar skólans koma að kennslu á bæði leik- og grunnskólastigi og annað starfsfólk tekur einnig þátt í verkefnum fyrir bæði skólastig.
Nemendur Þingeyjarskóla eru um 100 talsins, þar af eru leikskólanemendur um 30 á tveimur starfsstöðvum, á Laugum og í húsnæði Þingeyjarskóla í Aðaldal. Um tveir þriðju hluta grunnskólanemenda stunda nám við tónlistardeild skólans sem fram fer á skólatíma. Fyrir haust- og vorgleði skólans sameina grunnskóladeildin og tónlistardeildin krafta sína og nemendur setja upp leiksýningar þar sem áhersla er á þátttöku allra. Nemendur skólans undirbúa og aðstoða við sviðsmynd, sauma búninga, leika, syngja og annast undirspil af miklum krafti og sköpunargleðin leynir sér ekki. Tónlistarkennarar vinna einnig með leikskóladeildum í vikulegum tónlistartímum og sinna undirspili þegar leikskólanemendur syngja fyrir gesti og setja jafnvel á svið litla leikþætti.
Stefna um Jákvæðan aga er hluti af starfi allra deilda skólans. Verkgreinastofur skólans eru virkilega vel nýttar af bæði leik- og grunnskólanemendum og íþróttakennari skólans sinnir kennslu í íþróttahúsi og leikskóladeildum. Almenn áhersla er lögð á að styrkleikar hvers og eins nemanda sem og þekking og hæfni hvers starfsmanns fái að njóta sín sem best, nemendum og skólanum til heilla.